Galaxy S7 VS iPhone 6s 100℃ 高溫滾水測試

著名 YouTuber「TechRax」又折磨新款手機喇，今次玩到煲水烚熟手機，「受害者」包括最新上市嘅 Samsung Galaxy S7，另外對手就有 Apple iPhone 6s，睇下兩部機王浸落 100℃ 滾水將會有咩後果，但測試結果絕對令人意想不到！

TechRex 向來靠玩手機 Torture Test 而出位，最激嗰次玩到用煲熟嘅 Crayons 蠟筆，去煮熟一部全新嘅 iPhone 6s，部機最終搞到爆殼兼著哂火，真係睇見都「肉尺」。所以，TechRex 今次淨係玩滾水烚手機，已經算係濕濕碎咯。

iPhone 6s 十秒已投降

至於今次測試，Galaxy S7 同 iPhone 6s 都首先處於開啟狀態，然後直接浸入滾水中。喺最初嘅 10 秒，兩部機都表面上一切正常，屏幕仲著住畫面，但 10 秒過後 iPhone 6s 就即刻「投降」出警告，表示機身過熱要自動熄機，再過多 8 秒後黑哂畫面喇。

不過，同一時間 Galaxy S7 卻依然乜事都無，雖然未知有無死機，但喺滾水浸咗足足 1 分鐘都仲有畫面。影片鏡頭一轉，大概再過多咗 1 分鐘，就終於見到 Galaxy S7 出過熱警告而要自動熄機，但關機過程卻相當順利，臨終仲見到 SAMSUNG 同「metro PCS」電訊商嘅圖案畫面。

GS7 照常開機仲用到

TechRax 用工具將兩部手機移離滾水，經過幾分鐘 Cool Down 後，測試結果終於有分曉喇！向來予人感覺造工最好嘅 iPhone 系列，雖然設計上有防滴防漏，但都無可能抵得住 100℃ 滾水，嘗試幾次開機都失敗而肯定「Certified」咗。相反，Galaxy S7 竟然順利重新開機，按屏幕亦依然有反應，實在令人嘖嘖稱奇。

早前曾有俄羅斯 Blogger「Hi-Tech@mail.ru」拆解過 Galaxy S7，發覺它防水設計比以往簡單，機身並無加入橡膠圈，只係喺底殼內部加入一圈粘膠，以阻止液體由機背滲入機內。但呢次 TechRax 嘅滾水測試，至少證實 Galaxy S7 可浸在淺水一段短時間，但抵得住 100℃ 高溫，用家當係 Bonus 就好了，千祈咪亂試呀。

全文刊於 ezone.hk

更多科技潮流資訊，盡在 ezone.hk